Literatura

Izenburua: Telezailak. Nork esan zuen telebistak tontotu egiten duela?

Idazlea: Hainbaten artean

Argitaletxea: Txalaparta, 2011

You may need: Adobe Flash Player.

Deskarga

Idazle askoren aburuz, nork bere hiztegia idaztea baino ariketa literario gustagarriagorik ez dago. Literaturarekin loturiko plazeren sailkapena egingo bagenu, hitz bakoitzari gure barrenetik ateratako esanahi bat ezartzearena denen buru egongo litzateke. Aliceren lagun Humpty Dumptyk badaki zerbait horretaz.

Baina zein dugu zerrenda horren bigarren lekuan dagoen plazer literarioa? Bada, inolako zalantzarik gabe, irakurri ez duzun liburu baten inguruan hitz egitea (eta ahal bada, gaizki). Eta horixe da, hain zuzen ere, gaur hemen egingo duguna: irakurri ez dugun eta are aurrerantzean ere irakurriko ez dugun liburu bati buruz hitz egitea (eta egingo genuke gaizki, baina hemen kontua gomendioak ematea denez...). Horrela, bide batez, gainean daukagun Durangoko azokari ere gure omenalditxoa egingo diogu, han ere, liburuak erosi bai, baina erositakoen laurdenak ere ez baitu sekula irakurlearen begirik ikusten.

Harira. Telezailak. Nork esan zuen telebistak tontotu egiten duela? izeneko liburua hartuko dugu gaur hizpide. Tira, izan gaitezen zintzoak: liburu horrek hizpide duen gaia hartuko dugu guk hizpide, aldarrikapen txiki bat egiteko. Baina sikiera esan dezagun liburua Txalaparta argitaletxeak kaleratu berri duela, eta bertako editore Mikel Sotoren koordinaziopean, sei euskal idazlek fikziozko telesail anglosaxoiez hitz egiten dutela. Kito.

Telebista? Telesailak? Bada, bai. Gaur egun, istorioak kontatzeko orduan, telesailak dira jaun eta jabe. Zinemagintzak aspaldi utzi zion ganorazko ezer ganoraz kontatzeari (barkatuko ahal didate filmak gomendatzeaz arduratzen diren Aitor eta Txetxu lagunak!). Literaturak ere, nagiak jota dabilela ematen du, irakurleengan zirrara txikiena sortzeko ahaleginik egin gabe. Eta gainerako adierazpide artistikoek nahikoa dute museoak diren kartzela-zulo ilunetan bizirauteko eginahalarekin.

Gauzak horrela, telesailetan (anglosaxoietan eskuarki) aurkitzen ditugu egungo istorio eta pertsonaia interesgarrienak. Ahoa bete hortz uzten gaituzte astero Will Gardner abokatuak, Tyrion Lannister nanoak, Jackie Peyton erizainak, Nathan Young gazteak, Rick Grimes sherifak, Olivia Dunham FBIko ikerlariak, Sheldon Cooper fisikariak, Emma Swan Edurnezuriren alabak eta enparauek.

Zuek ere uste duzue telesailek leku bat merezi dutela Aiaraldean? Gure telebistetan, ordenagailuko pantailetan edo tabletetan ikusi ditzakegun telesailen gaineko gomendioak nahi dituzue? Bada, utzi itzazue iruzkinetan zuen aldarrikapenak. Aiaraldeko hauek ez dezatela pentsa lau zoro besterik ez garela!

Eta barka atrebentzia!