XX. mende hasierako baserri giroko gizartea ikusgai Felipe Manterolaren argazkien bidez

“Felipe Manterola. Baserri giroko gizarteko argazkilaria" izeneko erakusketa zabaldu zen pasa den astean Artziniega Museoan. Erakusketa horretan Zeanuriko argazkilariak egindako irudirik onenak biltzen dira eta, horien bidez, XX. mende hasierako Bizkaiko baserri-eremuko bizimoduan murgildu gaitezke. Guztira, familiak utzitako 75 argazki daude, bai eta kamerak, postalak eta bideo bat.

Felipe Manterola, esan bezala, Zeanurin sortu zen 1885ean, eta XX. mendeko lehenengo urteetan Arratia inguruko jendea eta jarduerak erretratatzen hasi zen. Modu dokumentalean egin zuen behar hori, baserritarrak, udatiarrak, umeak, erromeriak, janzkera, lanabesak eta beste hainbat gauza islatuz. Garrantzi handiko beharra egin zuen Manterolak, garai hartan gizartea erabateko iraultza baten atarian zegoelako. Azken batean. industralizazioa eta garraio-modu berriak ate joka zituen gizarte bat erretratatu zuen, sano lekukotasun garrantzizkoa utzita.

Erakusketa museoaren aldi baterako erakusketa-aretoan ikusi daiteke urtarrilaren 8ra bitartean, eta sarrera doakoa da.