Mendi-martxa Arakaldotik Untzuetara

Igande honetan, abenduak 26, Untzueta mendira irtenaldi bat antolatu dute Arakaldon. Irteera goizeko bederatzi eta erdietan hasiko da, Arakaldoko plazatik.

Duela sei bat urte martxan jarritako ideia da, eta Josu Zabala da haren bultzatzailea. Geroztik, Arakaldoko eta hurbileko herrietako hainbat pertsonek parte hartu dute irteera erakargarri honetan. Arakaldoko Udalak Gabonak direla eta antolatzen dituen ekintzen artean bat da, eta adin guztietako pertsonei dago zuzenduta, familiarekin mendian primerako eguna pasatzeko erakoa.

Untzueta gure ingurunean aski ezaguna den mendia da, goiko aldean Erdi Aroko gaztelua daukana eta Orozkoko lurretan dagoena. Gailurretik Gorobel mendizerra, Anboto, Gorbeialdea (Itxina bereziki) eta gure inguruko mendiak (Ganekogorta, Goikogane, etab.) ikus ditzakegu. 776 metro ditu eta ibilbide osoak, joan-etorriak, 7 kilometro ditu gutxi gorabehera. Igoera nahiko gogorra da, baina oraingo honetan erraiak hustea baino, bertaratuko direnen konpainiaz gozatzea da jomuga.

Paseotxua eta gero indarberritzeko aukera izango dugu Arakaldoko txokoan mokadu bat hartzen, eta horren ostean, eguerdiko hamabi eta erdietan, bolo-txapelketa egingo da elizaren aldameneko bolatokian.