Kiroldegiaren inguruko batzar irekia Aiaran

Aiarako udalak hilaren 9an agin zen Ez Ohiko Udalbatzarrean kiroldegiaren obrak ez jarraitzea adostu zuen, PP, Aiara Batuz eta Bilduren bozkak medio. Alderdi hauek ados jarri izana azterketa sakon eta arduratsu baten ondorioa izan zen, Josu Artetxe Aiarako alkateak adierazi bezala.

Honen harira, bihar arratsaldeko 19:00etan, Aiarako Udaletxeko Aretoan, herritarrentzako irekia izango den asanblada informatiboa antolatu da. Bertan Udal Korporazioak Aiarako Erabilera Anitzeko Kiroldegiari buruz hartutako erabakiaren gaineko beharrezko informazioa emango da. Talde politiko bakoitzaren iritziak aurkeztuko dira beren ordezkarien bidez, eta ondoren, eztabaidarako tartea irekiko da. Udaletxeko idazkaria ez da bertan izango bileraren izaeragatik eta izango duen ordutegiagatik.

Dena den, hainbat komunikabidetara bidalitako prentsa oharraren arabera, EAJ-k ez du bilera honetan parte hartuko "beraien iritzia eta esan beharrekoak komunikabideetan nahikoa azaldu direlako, udaleko alderdi ezberdinen arteko erlazioagatik eta udaletxeko idazkaria  bertan ez delako egongo", besteak beste.