Herritar eta zaleek Iñaki Isasi txirrindularia omenduko dute

Hamabost egun eskas pasatu dira txirrindulari aiararrak profesional izateari utzi eta Euskadi Fundazioko kirol zuzendari berria izateko erabakia hartu zuela jakin izan genuenetik (orduko hartan erabaki honen berri gehiago jakiteko asmoz elkarrizketa egin genion Iñaki Isasiri atari honetan bertan). Orain, bere herrikide eta zaleen eskutik omenaldia jasoko du hamaika urte hauetan txirrindula gainean egindako lana eta ahalegina goraipatzeko asmoz (5 Frantziako Tour, 6 Espainiako Bira eta Italiako Giro batean parte hartu du urte hauetan).

Omenaldia Arespalditzan bertan egingo zaio urriaren 30ean, "egindako lan eskergagatik eta auzokide eta gazteentzako eredu bilakatu delako eskualdean". Herriko inguruak zeharkatuko dituen bizikleta martxa laburra izango da eguneko lehenengo ekitaldia. Kaleetan ez ezik, Udaletxean ere harrera ofiziala egingo zaio kirolari aiararrari; aurreskua dantzatu, "Iñaki Isasi" izena duen erakusketa ireki, eta omenduaren hitzak entzuteaz gainera, bertaratutako txirrindulariekin solasteko aukera izango dute bertaratutakoek.

Harrera ofiziala amaitutakoan, gaztetxoenei zuzendutako txokolatada egingo da plazan, eta jarraian haurrentzako moto lasterketa.