Andra Mari Txiki jaiak ospatzen ari dira Baranbion

Herri txikiek egitarau handirik gabe ere jai herrikoi eta alaiak ospatzeko gauza direla frogatzen dute askotan, eta Baranbio horren adibide da.
Aurtengo Andra Mari jaietan ordea, ez dugu aspertzeko betarik izango, astearteko txupinazoan abiarazitako jai-egitaraua larunbatera arte luzatuko baita. Horrela, ostegunean meza ospatuko da Garrastatxuko baselizan eta arratsaldean partxis lehiaketa izango da, 16:30ean.

Ostiralean, baina, izango dugu eskaintza oparoagorik; eguerdiko 12etan meza Santa Marian eta zintzurrak eta sabelak aski betetzeko Astigarragako sagardoa eta txistorra izango ditugu dastagai. Karta-jokoen lehiaketetako finalak izango dira ostiralean ere, bai eta txokolatada herrikoia enparantzan. Arratsaldeko azken orduan, Belaiki Elkarteak antolatutako haur-erromeria izango da, “Xilipurdi” taldearen eskutik, eta egunari akabera emateko, 22:30ean areto dantzen erakusketa egingo da Buena Onda taldearekin, ordubete beranduago “Izargi” taldea izango da Baranbioko bazterrak musikaz eta dantzaz beteko dituena.

Larunbatean amaituko dira aurtengo Andra Mari Txiki jaiak.

Eguna Garrastatxuko zelaietan hasiko da, paella lehiaketan parte hartuko duten herritar goiztiarrekin. Ondoren, Herri Kiroletan desafioa izango da 12:30ean eta ordu bete geroago Paella Lehiaketaren sariak banatuko dira. Aurten ere ez da faltako Asto Lasterketa herrikoia, nahi duenak parte hartzeko irekia (astoak antolakuntzak eramaten baititu).
Arratsaldean, ordea, festa-giroa Baranbiora jaitsiko da. Tradizio eta ika-mika handiko Herrien arteko Herri Kirol desafioa ospatuko da 16:30etik aurrera frontoi inguruan. Gau partean afari herrikoia eta gaueko ordu txikietara arte luzatuko den erromeriak itxiko ditu aurtengo jaiak.